تجوع الحرة و لا تاكل بثديها

هكا علمونا الجدود وهكا قراونا علمونا كيفاش تعيش بعزه وكرامه وحر ميعفس عليك حد وما تبيعش روحك  بالرخيص على رأي الشاعر "لا تسقني كأس الحياه بذله بل إسقيني كأس الحنظل بعزه" اما يظهرلي هال المناظر البائسه اللي نهار ربي مادا وجوهها في تي في غابت عليه الدرس هذا وعطات لذل كارو قال شنوا الخبزه مره. سحافيي العار صارو ماريونات في يد إلي يدفع اكثر،باعو ميثاق المهنه باعو صوت الشعب باعو القضيه الوطنيه وتكفلو بنشطات السيد باعث القناة ادامه الله ذخرا لقلابة الفيسة وتجار السلاح وداعم رئيسي لرياضه ركوب الثوره ومساند لستار ضرابة البندير. ومن غير مان نطولوها وهي قصيره الي باع مره يبيع على طول ومشات ايام وجات ايام ونفس الوجوه إلي صنعت ديكتاتوريه بن علي إعلاميا تعاود في نفس العمليه القذره وتلوج كان على المناشدات متنجمش تقعد رايضه مره هاو "الشعب يطلب الإعتذار من رشيد عمار" ومره  الشعب يريد الامن ومره الشعب يريد يريد...ولا مره قالو الشعب يريد كرامه يريد التمتع بجميع حقوقو إلي يكفلهالو القانون. الحاصل يكملو الرويق متاع المناشدات تدخل علينا نقمه تي في بطلتها البهيه ومواضيعها الشفافه والهادفه مالا شنوا؟ آش ماشي في بالكم ؟موش كان مجاتش السحافيه اللامعه الفذه رانا مكتشفناش هويتنا آ مالا بفضل سي القروي و شلتو عرفت روحي بربري مل الام ومن اب برازيلي هعهعهع.ومتسمع كان الثوره المجيده وووو وفلول دراشكون والثوره المضاده الحاصل كلو كعك ما يطير جوع لا فلول ولا والو المشكل كل في كلمه وحدي تجوع الحره ولا تاكل بثدييها يعني وقت إلي الاحرار يوصلو لمكانهم المناسب وقتها تعرف تونس النمو المرجو موش بضربان اللوغه وهاكا الشعارات الرنانه تونس للجميع ولا للجهويه ولا لتفرقه كلو الشكاره والبحر على خاطر فما حاجه إسمها التطهير التطهير . مل لخر ندائي للاحرار لتكملة المشوار فنصف الثوره يعني هلاك امه والمثل الروماني خير دليل على كلامي اما بالنسبه لأشباه الرجال وإلي يعرف روحو رويبضه ولحاسة بن علي وتبسي ورشيد وعبدة اصنام بورقيبه إبعدونو يرحم ولديكم واعملو كيما زعيم القفافه بوبكر الصغير إلي صرت نحترمو  بعد إعتزالو الصحافه وإعتذارو للشعب على المسخره إلي كان يعمل فيها في مجلة الملاحظ. والسلام على من إتبع الهدى.