حصاد"توب 10" نكت وافلام الثورة سنة 2011 في تونس

ايا سيدي الحصاد جاء مخر اما موش مشكلة , مع شكر لكل النباره الإفتراضيين إلي ساهموا في إثراء العمل.
بشهادة كل المواطنين النباره حازت نكتة الزعبع "غلطوني احيانا.. انا مانيش شمس باش نزرق على ككاممللل الجمههههو خشخ خش.. ."
على المرتبه 10.

"سيحاسبون وبكل حزم...بكل حزم" حازت على المرتبة 9 كما حققت نجاحا جماهيري عربي باهر.كما إنها لقات اكبر عدد "شير" على المواقع الإجتماعيه،و"كوبي" باست" لدى الزعماء العرب.
المرتبه 8 من نصيب المسرحي المبدع محمد الغنوشي صاحب نكتة "أتولى..." إ لي شخصيا إعتبرتها الاقوى لما فيها من وضع دقييييق.
في نفس اللقطه متاع محمد الغنوشي تم رصد النكته السابعه 7:هي اللون البنفسجي الحاضر بقوه جنبا لجنب مع السفاح القلال،تخيل في خضم ثوره يطلعلك القلال بحلة تجمعيه لتهدئة الوضع....ثورة عوجه شويه.

النكته السادسه 6 هي: بوجمعه اليحياوي (كان تتذكروه،النائب الكرتوني الي لعبها طرزان بعد الدقيقه 90) قال كلمه وكان يتكلم الكرسي في باردو إلما ينطق:"سيدي الوزير ..تنحيني نحيك".

 وما اقرب الامس باليوم ونفس الآيه تتكرر غير ما تبدلت كان الوجوه.

المركز الخامس 5 كان من نصيب "أمير مؤمنين بن ڨردان" وين تفرجنا على فيلم رديء كما عودونا فنانينا المبدعين.

كما سجلنا خلال 2011 واقعة  هي هروب السيد العڨربي.إتنكرت تشدت...مشات نورمال خرجت نورمال ..تخييييل!!!!

عملية تهريب متعملتش كان في تونس لذلك مبروك على العڨربي براءة الإختراع.وإستاهلت عليها المرتبه الرابعه 4

لمن يعرف محسن مرزوق..اكيد باش يسئل وين موقع ها الكناتري من طرائف 2011،عامل مجلس تأسيسي منتصب بطريقه عشوائيه "موازي"،وهو بصدد البحث عن شعب موازي ونواب موازين وطبة ارض موازية،لذلك إلي عندو حويجه باش يعاون ويتوازى مرحبا بيه،ليشارك في النكته الثالثه3

النكته 2 هي للنائب المحترم إلي قاعد في مكان محترم يفرض هيبة الدوله ويساهم في بناء تونس ويمثل اصوت الشعب حين قام صارخا مستعينا بالشرعيه والمدّ الثوري وصاح "أنا لست بصاصا...آنا لست بصاصا " اوف اوف عملت الريحه حضرة النائب المحترم ولو إني موش عارف إذا بهذه الممارسات باش تكسب إحترام او لا.

النكته الفائزه معانا بجائزة المدونه وإلي تتمثل في عطور "جاردور" العطر الرسمي للخليفه السادس وكسكروت محرر الاكله الرسميه للمعارضه.النكته الاولى1 وبإمتياز "القناصه إشاعه".على راي الباجي قايد السبسي إلي شد واحد يجيب هولي...فعلا ماو طلع مفما حد ضرب بالكرتوش وإلي موش مصدق ينجم يطلع على التقارير الخاصه بمحاكمة قتلة الشهداء.تصور!!! يارآآآجل 

للاسف منجمتش نفك سر هال الإرتباط برقم عشره!! على خاطر النكته برشه وحصرها صعيب،شوف إنت وحدك عزيزي القارئ وزارة الداخليه وافلامها وحدهم يلزمهم كتاب،دون نسيان سكتشات البوليس السياسي.

ختاما،باش نطلب من الجمهور الذي تحركه العواطف و الأقوال أكثر من الأفعال ... لو واحد شاف ولو بالصدفه طارق المكي أو فرحات الراجحي أو بن سوڨير أو كل من كانوا أبطالا في التمثيل ، يبلغهم تحيّات المتفرجين .

ملاحظه: هناك من يشارك في صناعة الحدث .. وهناك من يسأل كيف حدث .. وهناك من يسأل ماذا حدث