هل إرتكبت ذنبا بالدفاع عن السلفيين؟؟

ملي وعيت على الدنيا وحليت كتاب وبديت شويه شويه ندرج في الحياه،تعرفت وكي اي واحد على الفكر الإسلامي والجماعات الإسلاميه وخصوصا كانت كلمة محضوره تزيد تحفزك اكثر لتعرف على تاريخها،طريق تكوينها،طريقة عملها خاصة وانها كانت تنشط في سريه..الحاصل تعرفوا إن اي شيء ممنوع يصير مرغوب،حطيت الامور في إطارها وبديت نسنس ونقعد مع عباد تنتمي لتيار وتنشط في الخفاء،كانت اول حقيقه ادركها هي ان الجماعات الإسلاميه اكثر من وحده ومن بعدها ثاني حقيقه إكتشفتها هي الصراع الفكري والجسدي مابين اشقاء التيار الإسلامي،المهم في الحكايه الكل تعرفت على مايبدو على تنظيم يدعى السلفيه الجهاديه وكما يحلو لبعض شبابها تسميتها السلفيه التكفيريه،لهنا ضربت في راسي إن نطلع اكثر على السلفيه الجهاديه وإكتشفت إنو التكفيرين زوز انواع،واحد يكفرك ومايهدرش دمك "مشكور"،يكتفي بقول "لانجالسهم،لانحييهم،لاننصرهم" وإكتشفت النوع الآخر إلي كان يظم شباب متحمس لنصره الدين وتحرير بلاد المسلمين،سلاحهم في ذلك كتب وفتاوي أبي محمد المقدسي،بحثت طويلا عن مصدر علم الجماعه وكان الامور صعيبه في وقت بن علي لم اتمكن من الحصول على المعلومات الشافيه والوافيه وكان بعض اعضاء الجماعه تتعرض لتضيق والمطاردات وكنت نتفكر كيفاه تصير عمليات الإقتحام والتفتيش الوحشي حيث كانت قوات الإرشاد بصدد البحث عن كتب قيل انها ممنوعه،كيما برشه توانسه ابديت تعاطفي مع شباب في عمر الزهور كانت ضحية عمليات قمعيه وحشيه وفي نفس الوقت ضحية فكر ضلامي ودمغجه.على قد ماوصفولي وقالولي إبعد عليهم الجماعه راهي العين ولات عليك على قد ماكنت مقتنع إن هؤلاء شباب لهم الحق في ممارسة عقيدتهم ،والحقيقة تقال لم اكن اعلم النوايا الخفيه لهؤلاء،لم ارى ضررا في نشاطهم ودعوتهم إلا انني كنت مخطئا فبن علي لم يكن سوى غطاء يستتر بقمعه السلفيين الجهاديين،يخبئون افكارهم وسمومهم ويروجو في صوره على انهم ضحية حرية المعتقد،سقط بن علي وحكومة الغنوشي وظهر الطوفان..

ظهر الطوفان..كلمه قالها احد قياديي النهضه في إجتماع للحركه بإحدى جهات الوطن وقالها بالكلمه "علينا محاربة الطوفان قبل مايهزنا الناس الكل" قبل مانوصلو للإنتخابت الكل نعرفوا آش صار في البلاد والإنفلات الامني والتجاوزات الفرديه والجماعيه إلي صارت وتبادل العنف وظهور رايات التوحيد والدعوه للخلافه وظهور تشكيات المواطنين من حملات التكفير وعلى فكره التكفير موش جديد في تونس، غير جديد على مكانش عايش في تونس..المهم كثرت التجاوزات وصارت معروفه للعيان وكتبت عليها الصحافه غير إن كل الناس كانت تكذب على روحها وتقول "فزاعه"،بوليس سياسي قوى الرده،لا ياسيدي تلك العُصبه موجوده ورغم نقص عددها إلا ان تصرفاتها بلغ صيتها العالم باسره،كنت في فترة الصيف متشوق لكشف كل ماقيل في شانهم ،كنت موش مصدق إلي جماعة "السلف صالح"تعمل هكه...الناس إلي كان بن علي مشقلبها في الداخليه تعمل هكه،وتزامنت عودتي بخروج بعض العناصر من السجن بعد العفو التشريعي العام إلي اهداهولهم الشعب،كانت القضيه التي زج من اجلها هؤلاء في السجن هي التحريض على الجهاد في العراق وفلسطين،والناس الكل تعرف طبيعة جهاد هذه العصبه في العراق وكيف لا والفضل لابي محمد المقدسي الذي افتى لهم بهدر دماء الشيعه!!! المهم في يوم من الايام داخل للقهوه وكان وقتها حديث الساعه عن شجار وقع في المسجد،سالت وجاوبوني بكل بساطه قالولي راهو فما جماعه دخلت مصلتش وراء الإمام وهزو بعضهم وعملوا جماعه مع بعضهم والاحداث هذي كانت في الصائفه الماضيه وما الاحداث الشبيهه إلي صارت في مسجد في المهديه إلا حافز جعلني اكتب هذه الاسطر لان الزبى سال عن حده،عديت الحكايه بسيف وآنا مبهم وموش فاهم آش صار بالظبط!!نزيد هكه ووتتعدى عليا حكايه اخرى شلتني،روي ان استاذ في معهد ثانوي وهو من العُصبه يحك اجنابو ويقول لطفله كانت جات الدنيا دنيا راك في الدار !!!إي نعم في الدار ..تخيل كلمه كيما هكه آش باش يكون الوقع متاعها على بوه البنيه وخوها وعايلتو!!!ونعم المربي هو ونعم السلف الصالح هو...جاء وقت الرد،الطفله حكات لبوها وهزها ومشى معاها وقاللها اليوم نحيلو دين والديه...الاب كان ارصن بكثير إنو يدخل في مناوشات إكتفى بالرد قائلا:إنت سي الاستاذ عندك مرتك؟ قالو:عندي،قالو إنت مرتك اكيد إنك تولدها في سبيطار وتكون تحت إشراف قابله،جاوبو:بكل تاكيد..رد الاب بهدوء:مالا سيادتك كي تبعثلي بنتي انا تروح وغيرها وغيرها شكون باش يولدلك مرتك!!! الإجابه على قد بساطتها على قفد ماكانت كافيه لإخراس حراس الدين...

تسارعت الاحداث وكلات بعضها من جديد بين الجماعه والنهضه وعموم الناس وكان الإختلاف على امور فقهيه بحيث كل واحد عندو علمو وعلماؤو،صارت مناوشات خطيره وصلت لحد القول ،مسجدنا ومسجدهم ،ولهنا إستهوتني الفكره باش نكمل إلي بديتو في رحلة التعرف على الجماعه،دخلت يوما "مسجدهم" وكانت الامور على مايرام ولاحظت تواجد كتب وفتاوى قد تكون غريبه وصعبه على شعب "ميمونه تعرف ربي وربي يعرف ميمونه"،وكانت الجماعه لاتستوعب ماكتب في الكتب ببساطه لإن مايكتبه إبن تيميه وإبن القيم الجوزي اكبر بكثير ان تستوعبه ادمغه جُعلت لممارسة النطح.جلست بهدوء لمتابعه خطبة الجمعه فما راعني إلا بشبان الجماعه تنقض على الإمام الطاعن في السن وتشن عليه حملة غوغاء وانزلوه من على المنبر وإستبدلوه بمن هو اكفأ منه واكثر منه علما!؟ إستشاط عامة الحضور غضبا ولكن دون رد فعل،وفي نفس الليله نظمت الجماعه صفوفها وقررت إزاحة الائمه الموالين لنظام بن علي،كان هذا ظاهر الامور ولكن بحكم معرفتي بالجماعه احسست بخلل ما وغاية في نفس يعقوب.
الجماعه لم تختر العنف في بادئ الامر بل إلتجأت إلى وسيله اكثر إقناع،عريضه شعبيه لإسقاط الايمه!!! سمعت بالعريضه قلت مافيهاش المصارحه والمواجهه،قابلت واحد من شباب الجماعه تربطني به صداقه قديمه وفي يدو العريضه،وحاورته....

ـ اهلا بمروان هيا هاو عندنا عريضه تحبش تصحح عليها،شد اقرى وصحح.
@ عريضه!؟متاع شنوى...إن شاء الله خير!!!
ـ ماك تعرف فمه ايمه وناس في نقابة الوعاض والايمه موالين لنظام وجاء وقت كنسهم
@هي باهي اما آنا الحق مانعرفوش الإمام اللي تحبوا تنحيوه والإمام إلي تحبوا تحطوه نعرفو ونعرف ماضيه الاسود في التبرديل والتبزنيس.
ـ لا كيفاش!!! نحن نحبو نصليو وراء واحد عن علم وليس عن جهل كما ان فرصه لدعوة الناس ونشر الإسلام ونحاربو الكفر!؟
حبست شويه وحليت وذني باش نسمع مليح لانو الحوار خذى منعرج خطير،وقلت في توتر:
@ شنوه باش تعملوا بالظبط؟؟؟؟تنشر وتحارب فيق ياشفيق!!! احكيها لغيري الحكايه هذي...
ـ لا والله قاعدين نتعرضوا لحملة تشويه للدين واعداؤو قاعدين يوم بعد يوم يستفزوا فينا،نسمه شفتها آش عملت وإلا هك إلي سب الرسول ووووو
حاولت نهدي الحوار لانو عادة تحاور في منظومه معقده...إسترجعت شوية هدوء وقلت:
@ياولدي موش معقول تكفر الناس،ياولدي الزبراط إلي تسفه ومن بعد تكفرو وبعد إتحب طبق عليه الحد هو إلي خرج صحابك مل الحبس.
للي حاور ناس من قبيل جماعه الديمقراطيه كفر وتصويتك لحزب يساري كفر والتحزب كفر يفهم المعانات واكيد إن عرف الإجابه،اجابني بكل هدوء وإبتسامه تعلو شفتيه:
ـ في تلك الاوقات إستجاب الله لدعائنا "اللهم اهلك الظالمين بالظالمين واخرجنا من بينهم سالمين"
بالطبيعه تكونسيت للحظات وعرفت إن محاورت له كانت سذاجة مني وإستدركت الامر وحاولت زرع الخوف في نفسه وقلت:
@ في بالكم إلي الدوله باش تسكتلكم؟! راك غالط على طول الخط،كان ماشي فيبالكم الحريه تتعدى على صلحيات غيرك راك غالط،الدوله تعاود تهيكل روحها وستمسك بزمام الامور...
قاطعني قائلا: ـ نحن سوف ننشط وننشط ونقيم دولة الخلافة في قلبنا ...
وهات من هكه الكلام المصبوب ليهم بالقْمَع،لهنا عرفت إن الجماعه متستعرفش اصلا بمصطلح دوله...
@ياولدي فمه قانون في البلاد راهي موش غابه!!!!
ـ قوانين العباد متلزمنا في شيء،المهم قانون رب العباد.قالها بكل عصبيه وإشتد الحوار وبدى الضرب تحت الحزام...

كان لحادثة تكسير قاعة افريكار للسينما وقع جليل،سال الحبر،ظهر من جديد مصطلح بوليس سياسي وبطبيعه البلاد موش مستقره وكل الظروف تهيأ على إنها حادثه معزوله،وتم إحالة المتهمين على انظار المحكمه وكان فمه ناس نظمت وقفه إحتجاجيه تضامنيه مع المحتجزين،عدت لمحاوري في محاولة جديده من اجل ان يكف هو زبانيته عن إلحاق الاذى بهذا الشعب الذي طالما دافع عنهم ومازال.

@ريت آش صار في قاعة السينيما؟

ـ يستاهلوا..قالها بكل وقاحه!؟

@ ياولدي هكه راكم باش ترجعوا منين جيتو وتقعو في عزله ويوم إلي يقع الزج بيكم في السجن متلقاش شكون ياقف معاكم...

ـ عزلتنا عزتنا ووحدتنا سجننا.

 وبرشه حديث يصيبك بالغثيان،فما كان لي إلا ان انسحب تاركا عقلا رافضا للحوار،ضاربا في العنتريات 

والجهل واسفت على كل يوم دافعت فيه عن تلامذة ابو ايوب التونسي.

وكيما كانو يتغطاو بقمع نظام بن علي لهم،هم اليوم يتحركون تحت غطاء الإسلام وحكومة "إسلاميه".
لذلك وجب التنويه والحذر من الطوفان