Rechercher dans ce blog

jeudi 22 mars 2012

عيد ميلاد سعيد


السّلام عليكم ورحمة الله وبركاته 3 مرّات...


بمناسبة عيد ميلاد المدونه الأول ربي يعزّها وتتّربى في عزّكم أصدقائي وصديقاتي،حبيت منفوتش اللحظه باش نركب على الحدث ونتوجه بالشّكر لرئيس الجمهوريه راعي الشّباب والطفوله على العنايه الموصونه. 

يقول القايل كيفاه دخلت لهذا العالم وما سبب غرامي بيه ؟ 
 بون مانيش باش نطوّل عليكم اول ارتيكل قريتو نتفكر كان في blogs- tn المَجْمع التّدويني التّونسي والتدوينه كانت بعنوان Le zero qui veut quitter moins l'infini   في مدونة راديو المتنوشه وإلي الحق عجبني برشه البوست وخلّيت فيه تعليق في شكل "غير معروف" موش خوف وإلا حاجه امّا الحق وقتها جهل تامّ بمعنى البلوغ والتعاليق وكان صحّ القول غابت عنّي آداب المدونات.

بطبيعه الآرتيكل كان عندو عليّا وقع كبير،ريت تصاور مدونات أخرى وقريت أسامي مدونين هزّني الفضول باش نعرفهم (موش شخصيا اما نتعرّف فاش قاعدين يكتبوا).
وإنطلقت الرحلة... نتجوّل يمين يسار،مدونات ثقافيه وأخرى فيها نقاشات سياسيه وإجتماعيه ..تي الحاصل كان شي يعمل 66 كيف.
وككلّ متابع للشأن الوطني ومع إندلاع الثوره زاد ولوجي إلى المواقع الإجتماعيه وزاد إهتمامي بالصفحات الفايسبوكيه ولهنا المقصود بالفيسبوكيه موش صفحات الثوره باش نكونو متفاهمين إيمانا مني إن تاقف وراها ناس ناقصون عقل ،موش تفاخر او شيء آخر ولكن البلوغسفير علمّني الكثير وخلّى التحاليل والمواضيع المطروحه تكون أقوى بكثير من المطروح في الفايسبوك.وإلي على ذكر الفايسبوك يمكن نتحسّر على حاجه وحده هي إنّي تعرفت على وجوه خير كيفكم مخّره شويّه وهذي غلطه منّي ،إنّي إستحقرت المواقع الإجتماعيه.

ومشات الأيّمات وقرّرنا بعد تمحيص وتفحيص إنّي ندخل في هذا العالم الإفتراضي والإجتماعي في وقت واحد لا طمعا في سلطه ولا فلوس،توكلّنا على العالي وحلّيت المدونه وأثثّتها وبقات ناقصه الأهم "الكتابة".
الحاله مطولتش والحمد لله وكانت أول حاجه نكتبها كانت محاوله في مدونة راديو المتنوشه تحت عنوان "رسالة إلى صحافتنا المتلونه" بتاريخ 04 أفريل 2011.وكانت الإنطلاقه وإلى حد كتابة هذه الأسطر :))


ختاما :


أشكر كلّ أصدقائي إلي منهم تعلمت الكثير والكثير وبحول الله مازلت نتعلم منهم. قضيّت وقت ممتع جدا في أروقة مدوناتكم : العزيزه غيغوز(guyguoz) وصاحب حسن تسطيره الغالي (Elfan) و الرائع باخوس (Bacchus) وبنفسجيست حرّ (Calimero) والڨطوس (راديو المتنوشة) وكلاندستان(demain-je-brule) وأيمن الجمني (الشنفرى) وشهاب(من بلد اليقظ) والبرباش (tbarbich) والقائمه تطول... 


ملاحظة فقط أنا لاأدعي صفة مدوّن الثّورة أو إنّي قدت الثّوره او حتّى زايدت على الثّوار ولكن  لست راكبا على الثّوره ببساطه على خاطر هي ثورتي وثورتك في نفس الوقت وموش ناوي نسلّم فيها على خاطر هي ثورة شعب كامل قبل متكون حكر على أيّ واحد.ولتصحيح المفاهيم أكثر أنا والحمد لله كلمتي نقولها في النايف قبل تدوينها :))


سلام على شعبنا الكريم....

8 commentaires:

bacchus a dit…

مروان العزيز
أبارك سنتك الأولى تدوينا وقدأشعلت الشمعة الأولى لأنك لست ممن يطفيء الشموع وهو يحتفل فنحن في حاجة إلى النور. ما أجمل ما تقوم به وما أروع تواضعك صديقي. تونس تحتاج كل أبنائها عشّاق الحرية والأمل وأنت منهم. في انتظار جديدك صديقي دمت بخير ودامت مدونتك صوتا للحرية.

Chimère a dit…

عيد ميلاد سعيد

guyguoz a dit…

أيها الطفل الطيب لا تهجر في عامك الثاني الوداعة و تحدث عن المشاعر ستعطيك يا ولدي حجة و تفهما لما ستلقى ظل حبيب أمك الإفتراظية في عامك الثاني ..

EL FAN a dit…
Ce commentaire a été supprimé par l'auteur.
EL FAN a dit…

صاحب حسن تسطيره وصاحب أيمن الزواغي زاده هههههه
أما يا ولدي اخطاك بلا تعلمت من عندي راني ما نعلم كان قلة المعروف هههههع
المهم سيدي بداية موفقة وكل عام وإنت والمدونة في خير ونعمة :)

chraigui a dit…

@Bacchus دمت متألقا وشكرا على مرورك ومشاركتي إحتفالي الصغير :))

@Chimère تشكرات :))

@guyguoz حبيب أمه الإفتراضيه لم يفارقه ظله ولكن فارقته المشاعر ليتمكن من رؤية الصورة كاملة، مشاعري وإن غابت فإني غيّبتها قصرا وركنتها في أعماقي وحكمت عقلي والروية محاولا للحصول على الحجه وما أحوجني إلى الحجه... حبيب امه الإفتراضيه يحيها ويشكرها على صراحتها وما قدمته ومازالت تقدمه إليه:)

chraigui a dit…

@elfan ههههههه قلة المعروف في بعض الأوقات مفيده وتقدر بعلم ههههههه
إنت عباره مولى الدار موش لازم نفرح بيك ونشربك ڨازوزه ونقلك شكرا على المرور ههههههه

زَرَتُونسي a dit…

عيد ميلاد سعيد و بالتوفيق

Enregistrer un commentaire